ជួប​ជុំគ្នា​ផឹកស៊ី​ចាក់​ធុង​បាស់​រំខាន​ដល់​អ្នកជិតខាង សមត្ថកិច្ច ​ចុះ​ហាមឃាត់​ទាំង​យប់

ភ្នំពេញ​ ៖ ​ការ​ផឹកស៊ី​ចាក់​ធុងបាស់​ពេលយប់​រំខាន​ដល់​អ្នកជិតខាង​ចំនួន​៥​កន្លែង ត្រូវ​បាន​សមត្ថកិច្ច​ចុះទៅ​អប់រំ​ណែនាំ ឲ្យ​បញ្ឈប់​សកម្មភាព កាលពី​យប់​ថ្ងៃ​ទី​១ ខែ​មេសា ឆ្នាំ​២០២០ ក្រោយពី​មាន​ខំ​មិន​រាយការណ៍​ពី​ប្រជាពលរដ្ឋ។

ជាក់ស្ដែង ក្រោយពី​ប្រជាពលរដ្ឋ​ខំ​មិន​រាយការណ៍​នៅលើ​ផេ​ក​ស្នងការដ្ឋាន​នគរបាល​រាជធានី​ភ្នំពេញ​ថា នៅ​ចំណុច​ផ្លូវ​បេតុង ក្រុមទី​៣ ភូមិ​ព្រែក​តា​គង់​១ សង្កាត់​ចាក់អង្រែលើ ខណ្ឌមានជ័យ មានការ​ផឹកស៊ី​ចាក់ធុងបាស់​នោះ​, កម្លាំង​ប៉ុស្តិ៍​ចាក់អង្រែលើ នៃ​អធិការដ្ឋាន​នគរបាល​ខណ្ឌមានជ័យ បាន​ចុះ​ដល់ទី​តាំង​ភ្លាមៗ​ដើម្បី​ធ្វើការ​ណែនាំ អប់រំ និង​បញ្ឈប់​រាល់​សកម្មភាព​ផឹកស៊ី ចាក់ធុងបាស់ ស្រែកច្រៀង​ឡូឡា បង្ក​សំឡេង​រំខាន​អ្នក​ជិត​ខាង​នេះ១​ករណី​ទៀត ក្រោយពី​មាន​ពលរដ្ឋ​ខំ​មិន​រាយការណ៍​ថា សូម​លោក​ស្នងការដ្ឋាន​នគរបាល​រាជធានី​ភ្នំពេញ ចុះ​មក​ត្រួតពិនិត្យ​ការផឹកស៊ី និង​ច្រៀង​ឮ​ៗ​នៅ​ភូមិ​ទឹក​ថ្លៃ សង្កាត់​អូរ​បែ​ក្អម ខណ្ឌ​សែន​សុខ នៅ​ក្រោយ​អគារ​Atwood​នោះ, កម្លាំង​ខណ្ឌ ប៉ុស្តិ៍ ក៏បាន​ចុះ​ដល់​គោលដៅ​ភ្លាមៗ ដើម្បី​ធ្វើការ​ណែនាំ អប់រំ និង​បញ្ឈប់​ភ្លាមៗ​នូវ​សកម្មភាព​រំខាន​ទាំងនោះ

ដោយឡែក​២​គោលដៅ​ទៀត ​​ក្រុម​ព័ត៌មាន និង​ប្រតិកម្ម​រហ័ស​នៃ​ស្នងការដ្ឋាន​នគរបាល​រាជធានី​ភ្នំពេញ ​បាន​ផ្តល់​ដំណឹង​ជូន​លោក​វរសេនីយ៍ទោ​ ស៊ឹម ពិសិដ្ឋ​ ភ្លាមៗ ​ក្រោយ​ពី​មាន​ការ​រាយការណ៍​ ​ ដើម្បី​បញ្ជា​កម្លាំង​ឲ្យ​ចុះ​ដល់​គោលដៅ​ទាំង​២​នោះ​ ក្នុង​សង្កាត់​បឹងកេងកង​២ និង​អូឡាំពិក ​ដើម្បី​ធ្វើ​ការ​ណែនាំ​ អប់រំ និង​បញ្ឈប់​រាល់​សកម្មភាព​ផឹក​ស៊ី​បង្ក​សំឡេង​រំខាន​ដល់​អ្នក​ជិត​ខាងនៅ​យប់​ដដែល​នេះ ​សមត្ថកិច្ច​ប៉ុស្តិ៍​នគរបាល​ទួល​សង្កែ​២ ខណ្ឌ​ឬស្សីកែវ ក៏​បាន​ចុះ​ដល់​គោលដៅ​ភ្លាមៗ​ផង​ដែរ ​ក្រោយពី​ទទួល​បាន​ខំ​មិន​ពី​ប្រជាពលរដ្ឋ ដែល​ផ្តល់​ដោយ​ក្រុម​ព័ត៌មាន និង​ប្រតិកម្ម​រហ័ស​នៃ​ស្នងការដ្ឋាន​នគរបាល​រាជធានី​ភ្នំពេញ ថា ​មាន​ករណី​ផឹកស៊ី​ចាក់ធុងបាស់​បង្ក​សំឡេង​រំខាន​ខ្លាំង តាំងពី​ព្រឹក​រហូតដល់​យប់ ជា​រៀងរាល់ថ្ងៃ ដោយ​បានធ្វើ​ការណែនាំ អប់រំ និង​ឲ្យ​បញ្ឈប់​ភ្លាមៗ​នូវ​សកម្មភាព​រំខាន​ដល់​អ្នកជិតខាង

Related posts

Leave a Comment